Nyʋ "diwan po ‑tɩ
26
Ao se "nyɩɩ dɩ ‑gbai" nʋɩ, ao se dɩ ‑pa i 'de ao se dɩ ma i, ‑wɛe ao se "soi ‑pa i, dɩ seɛ ‑pʋn" 'nɛ i 'de ao seɛ i nyna i 'de aoa' 'blʋa 'di ‑wɛe aoa se 'kɔu i tba i 'de ɛ "juɛi, dɛ dɛ‑nʋɛ' 'mɔ ‑nɩ Nyɔsoa aoa' Kea.2 Aoa muɛ 'ma ‑kwlewɩ "klein 'ɩn "nyɩ aopʋ wɔn 'jea ‑wɛe ao 'je 'ma ‑gbu" ‑kwɛai 'a ni' ‑te'. 'Mɔ ‑nɩ Nyɔsoa.
3 ‑Bo ao kpʋn 'ma 'srɩn ɛ, ‑wɛe ao 'je 'ma kɛ' wɔn, ‑wɛe kɩ "sia 'nynɩ ao 'je 'kan na a, 4 'ma muɛ aopʋ "ni "nyɩa 'de ɛɛ' nɔ" "i, 'blʋa a muɛ nmɔa' ‑wɛe aoa' croodɩ 'je ɩa' 'jɔ to. 5 Aoa muɛ aoa' ‑ble'a blaa' sia' 'sʋ rɛsɩnb ɛ cɛn nɔ" 'je nyni ‑wɛe ao 'je ‑mɩ a cɛan' siie mamaʋ 'sʋ dɩ do nɔ" 'jee nyni, aoa muɛ dɛdia' ao 'je dbo, ‑wɛe ao 'je 'flɛ 'ʋn ‑te 'de ao "bli. 6 'Ma muɛ ku peɛ' 'ʋn ‑tea' 'de aoa' 'blʋa 'di poa', ‑bo ao 'kpa "nyɩɔ ɛ, dɛjrɛ' se aoa' "nyɩɔ doa i, 'ma muɛ nmi -ɩa doa dɩ 'de aoa' 'blʋa 'di ‑saa ‑wɛe tʋ se 'kpai 'de aoa' 'blʋa 'di. 7 Aoa muɛ aoa' tʋnyʋ inʋa', ‑wɛe ʋʋ 'je 'wla 'de aoa' poodɩ 'a wɔn "i. 8 Aoa' ‑mm" a muɛ ʋʋa' kmɛ' due' i nʋa', ‑wɛe aoa' kmɛ' due' 'je ʋʋa' ‑kwlʋ due' inʋ, ‑wɛe aoa' tʋnyʋ 'je 'wla 'de aoa' ‑cnɛ ɛ nɛ ɛ "wɔin. 9 'Ma muɛ aoa' ‑tɩ' ‑tu" 'a, 'ma muɛ nʋa' ao 'je ‑gbɛn' ‑wɛe ao 'je "i ‑tie, ‑wɛe 'ma muɛ dbɛɛdɛ ‑nɩa 'de ao ke 'ɩn 'nynɩ i kpʋʋn 'a. 10 Ao 'bɛɛ nɛ' ao 'je aoa' diiɛ soa ao ‑tea i 'dɔe 'ʋn di mamaʋ 'sʋ, ‑wɛe ao 'je ɩa' 'soa "kpae "sii- ‑wɛe ao 'je dee' 'de "sraan po. 11 'Ma muɛ aopʋ "klu "tia ‑wɛe 'ɩn se aopʋ nyai ‑fuun i. 12 'Ɩn ke aopʋ a muɛ naa', 'ma muɛ aoa' Kea nɩa' ‑wɛe ao 'je 'ma 'cɛ nɩ-. 13 'Mɔ ‑nɩ Nyɔsoa aoa' Kea, ‑ɛ ‑sa aopʋ 'de Esipʋ ‑wɛe ‑ɛ -cɛn aopʋ kʋɔn ɔ' "dbu i. 'Mɔ ‑sa aopʋ 'kle klaa" "kpei ‑wɛe ao ‑te 'kle "jɛi aoa na.
14 'Kaa ‑bo ao se 'ʋn doun" o po, ‑wɛe ao se ka 'ma kɛ' "sia 'nynɩ nʋ ɛ, 15 ‑bo ao blaa 'ma 'srɩn wɔin ‑wɛe ao ‑fuun 'ma kɛ' nyai, 'de ɛ 'je 'kan nɩ ‑wɛe ka 'ɩn "sia 'nynɩ ao je 'kan na-, 'de ao 'je 'ma dbɛɛdɛ ‑saa a, 16 dɛ 'ɩn 'jea aopʋ "jrii nʋ ɛ ka: 'Ma muɛ nʋa' ao 'je ‑sɔɔn klaa" 'je aopʋ 'ʋn "ti ‑wɛe ao 'je "jɛi woi 'pʋan‑ 'de ku ‑sɔn i 'a nɛ nɩa' 'je ao "jri 'de nɩ ‑wɛe ao 'je sʋn ‑kwlɩ" ‑tu". Aoa muɛ dɩ doa' foo" 'ʋn, dɛ dɛ‑nʋɛ' aoa' tʋnyʋ a muɛ ɩa' 'jɔ "kpei "siia. 17 'Ma muɛ aopʋ dɛ "i toa': Aoa' tʋnyʋ a muɛ aopʋ "dua: Nyʋ ‑nyɩa aopʋ 'ʋn mʋ ‑ʋʋa mu aopʋ 'blea, ‑bo nyɔ jrɔ' se aopʋ inʋ mɔ de ɛ, aoa muɛ plea'.
18 ‑Bo ‑mɩ nʋʋɛ 'kan 'de ao se 'ma wlu doin" o po kewlɛ', 'de aoa' dɛsaʋn 'a ‑tɩ' 'ʋn 'ma muɛ aopʋ ɩa' -kao klae" klae" 'a kpɛ ‑mɛ" 'sɔn "kpei jaa' 19 'Kpɩ ao 'blea, ‑ɛɛ ‑tɩ' 'ʋn aoa 'bɛɛa aoa' ‑cɛ" "i ɛ 'ma muɛ ɩ i ‑craa', 'ma muɛ nʋa' jaʋn 'je kmu- ka nɩɩɛ nɩa 'de aopʋ "jru kpɔ, ‑wɛe aoa' 'blʋ 'je ‑kɔ' "nma. 20 Aoa muɛ 'kpɩ nʋʋa' foo" 'ʋn, 'blʋ se nmɔ i ‑wɛe aoa' tu se 'jɔ jrɛ' cro i.
21 ‑Bo aoa sea "jru kua' nya kpa 'de ao seɛ "i nɩ ao 'je 'ma wlu doun" o po, 'ma muɛ aopʋ blaa' kpɛ ‑mɛ" 'sɔn "kpei ‑tu" 'a 'de aoa' dɛsaʋn 'a nɩsʋn 'a ‑tɩ' 'ʋn. 22 'Ma muɛ aopʋ 'kwladi nmi "kpei jaa' ɩ 'je aoa' "nynuu kpʋn, ɩ 'je aoa' nmi i -sa ‑wɛe ɩ 'je ao "kpei cɛn ‑wɛe ao se "i ‑tii, ɛmɛ ‑ɛɛ mu nʋa' nyɔ jrɔ' se 'de aoa' ‑jeblʋ "i nai.
23 ‑Bo ‑mɩ se aopʋ "wɔin 'bɛɛ‑ 'de ao se aoa' ‑cɛ" "i "tai- 'ɩn se ao 'srɩn ‑tu" ɛ, 'de ao 'je 'ʋn "mla "i nyna a, 24 'mɔ ‑ke ɛ, 'ma muɛ aopʋ "mla "i nynaa' ‑wɛe 'ɩn 'je aopʋ bla kpɛ ‑mɛ" 'sɔn ɛ 'je ‑jɛ ‑saai" ‑sii 'de aoa' dɛsaʋn 'a ‑tɩ 'ʋn. 25 'Ma muɛ tʋ "blo ‑saa' 'de ao "kpei ‑wɛe ɛ 'je 'ma dbɛɛdɛ ao ‑saa 'a ‑kao nɩ-. ‑Bo ao pa 'kwla 'de aoa' ‑kwlɔ klae" klae" 'dii ɛ, 'ma muɛ 'wɛ ‑ɛɛ 'bɔ a "blo ‑saa' 'de aopʋ "klu, ‑wɛe ao 'je aoa' tʋnyʋ 'kwa sie. 26 -Bo 'ɩn -sa aopʋ diiɛ 'kwa a, ɛɛ muɛ nʋa' 'nynɔkpae ‑puue 'je ʋʋpʋ 'a diiɛ ‑sia 'de ʋʋpʋ 'kwa pi 'de jae‑ due' 'di, ‑bo ʋʋ dbɛɛ nɛ mɔɔ' ‑cɛ" ‑wɛe ʋʋ 'jeɛ 'ʋn ‑sea' mɔ 'de ɛ, ɛ se aopʋ 'a mɩɛ jajaa i.
27 ‑Bo ɛ 'wlʋ ‑mɛ "kpei ao se 'ʋn doun" o po ɛ, 'de ao 'je 'ʋn "mlai i nynaa' nya kpa a, 28 'Ma muɛ aopʋ 'mla "i nynaa' 'de 'cɛn 'ʋn ka ‑cɔɔn'‑ ka ‑wɛe 'ɩn 'je aopʋ dɛ "i to kpɛ ‑mɛ" 'sɔn kewlɛ' ɛ 'je jɛ ‑saa "i ‑sii 'de aoa' dɛsaʋn ‑tɩ' 'ʋn. 29 Aoa muɛ aoa' ‑cɛ" 'ɛ "nynuu 'a nmi dia'. 30 'Ma muɛ aoa' "nyɩɩna' ‑nɩa 'e crʋ "kpei i ja ‑gbaa', aoa' "kpa -ɩɩ "kpei aoa poa paifɛn' "jri 'ma muɩ iwaa', ‑wɛe 'ɩn 'je aoa' "ku i 'wooa 'de aoa' "nyɩɩ dɩ 'a 'kao kpiin "kpei, 'ma muɛ aopʋ nyai ‑fuun 'a. 31 'Ma muɛ aoa' "kwi ‑kwlɔ ‑wee' waa', 'ɩn 'je aoa' "nyɩɩna' ‑wee' i ‑sa, 'ɩn se ma ‑cɛ" "i "tai- i ‑wɛe aoa' 'sraadɩ 'a 'nʋ se 'ma pɛe jajaa i. 32 'Ma ‑cɛ" ɛɛ mua aoa' 'blʋa ja ‑gbaa, ɛɛ muɛ nʋʋa' aoa' tʋnyʋ ‑ʋʋa muɛ 'di ‑tea' jia' ɛ 'je ʋʋpʋ tai "maa‑. 33 'De ao mɔ ɛ, 'ma muɛ aopʋ 'blʋa ‑ɩ sea Kea juo 'dii -gblea', ‑wɛe 'ɩn 'je aopʋ ‑cnɛ 'de i 'blee‑, aoa' 'blʋa a muɛ ja ‑gbaa' ‑wɛe aoa' "kwi ‑kwlɔ 'je 'kaokpuin nɩ-.
34 ‑Bo ɛ nɩ 'kan ‑mɛ 'blʋa -sia a muɛ ‑sɔn ‑tuu" ‑tuu 'jea ɛ 'je fɔn 'de nɔ" ‑ɛɛ 'di ao nɩa 'de aoa' tʋnyʋ 'a 'blʋa 'di, ‑bo ɛ nɩ 'kan ‑mɛ ɛɛ' fɔn 'a muɛ saba ao sea wɔn 'je -kɔo "sia. 35 'De nɔ" "klein ‑ɛɛ 'di 'blʋa ‑gbaa ja, ɛɛ muɛ 'kpʋ 'e ‑saa 'de fɔn 'a ‑sʋn ao seɛ "nyɩ 'de nɔ" ‑ɛɛ 'di ao nɩa 'de ɛ "kpei ɛ.
36 Nyʋ ‑ʋʋa mua 'kmʋ sia' a, 'ma muɛ ʋʋpʋ 'a pɛe faʋn "jia 'de 'blʋa ‑ɛɛ 'di nyɔ ‑te ʋʋpʋ ‑klan" "kpei ʋʋ mua, 'de ʋʋa' tʋnyʋ 'a 'blʋa 'di. Kɔin wɩn ‑ɛɛ -wla 'a 'sʋ 'a ‑cruɛn" ɛɛ muɛ nʋa 'sʋ ʋʋ 'je ple 'ka nyɔ ɔ plea ɔɔ' tʋnyʋ 'a ‑cnɛ "juɛi ɛ, ‑wɛe ʋʋ 'je blu 'de ‑mɛ nyɔ jrɔ' se ʋʋpʋ i nʋ. 37 Ʋʋa muɛ ba wɔn blaa' 'ka nyɔ ɔ plea ‑cnɛ "juɛi ɛ 'de ‑mɛ nyɔ jrɔ' se ʋʋpʋ i nʋ, ‑wɛe ʋʋ seɛ bɛɛ- i ʋʋ 'je ʋʋpʋ 'a tʋnyʋ "juɛi nyna. 38 Aoa' muɛ 'mɛɛa 'de 'blʋa 'srʋ 'di ‑wɛe aoa' tʋnyʋ 'a 'blʋ 'je aopʋ di. 39 'De aopʋ "klu nyʋ ‑ʋʋa mua puua', ʋʋa muɛ sɔɔa' 'de ʋʋa tʋnyʋ 'a 'blʋa 'di 'de ʋʋa' dɛsaʋn ke ʋʋa "bɛman 'a dɛsaʋn 'a ‑tɩ' 'ʋn.
40 'Sʋɛ ʋʋa muɛ ʋʋ ke ʋʋa' "bɛman 'a dɛsaʋn "i jua', ʋʋa' se wlu "kpei i kpʋn a' -tɩ 'ʋn ke "mlai ʋʋpʋ nyna 'ʋn ‑ke. 41 Ʋʋa muɛ jua' ka 'ɩn nyna ʋʋpʋ 'mlai -ke ɛ, -wɛe 'ɩn kpa ʋʋpʋ 'de ʋʋa tʋnyʋ 'a 'blʋa 'di. Ʋʋa muɛ ʋʋa' ‑cɛ" ja jaa' -wɛe ʋʋ 'je nʋ -a se wlu "kpei i kpʋn, ‑wɛe ʋʋ 'je ʋʋa' dɛsaʋn 'a -kao 'wɔɔn-. 42 'Ma muɛ dbɛɛdɛ ‑nɩa 'ɩn ke Sakɔbʋ 'nynɩ, dbɛɛdɛ ‑nɩa 'ɩn ke Isaakɩ, ‑wɛe dbɛɛdɛ ‑nɩa 'ɩn ke Ablaam 'nynɩ ‑tɩ ‑kwlʋ o poa', wɛe 'ɩn 'je 'blʋa 'ɩn 'jea ʋʋpʋ "nyɩ 'a ‑tɩ' ‑kwlʋ o po. 43 Dɛ dɛ‑nʋɛ' nɔ" ‑ɛɛ 'di 'blʋa gba ja ‑wɛe ʋʋpʋ 'wlʋ ɛ 'di ɛ 'blʋa a muɛ fɔn 'a. Ɛɛ nɔ" tu 'di ɛ, ʋʋa muɛ ʋʋa' dɛsaʋn 'a -kao 'jea, dɛ dɛ‑nʋɛ' ʋʋ pooɛ 'ma 'srɩn sʋn i ‑wɛe ʋʋ ‑fuun 'ma kɛ' nyai. 44 'De ‑mɛ, nɔ" ‑ɛɛ 'di ʋʋ nɩa 'e ʋʋa' tʋnyʋ 'a 'blʋa "kpei ɛ, 'ɩn se ʋʋpʋ nyai ‑fuun i ‑wɛe ʋʋpʋ se 'mii nyaa i nyʋ 'je ʋʋpʋ 'a ma" i ‑sa, ‑wɛe 'ɩn 'je dbɛɛdɛ ‑nɩa 'de ʋʋ ke 'ʋn 'nynɩ "i ‑sea, dɛ ‑nʋɛ 'mɔ ‑nɩ Nyɔsoa ʋʋa' Kea. 45 'Ka dbɛɛdɛ, ‑nɩa 'e ʋʋa' "bɛman ‑wi" 'ɩn ‑sae' Esipʋ 'de 'blʋa ‑wee' "jri "kpei ‑wɛe 'ɩn 'je ʋʋpʋ 'a Kea nɩ, 'ma muɛ ʋʋpʋ 'dɔe "jrii nʋʋa': 'Mɔ ‑nɩ Nyɔsoa.
46 'Kamɔ 'srɩn o, dɛ nyʋ 'jea nʋ o, kɛ' Nyɔsoa jaa 'de Moisɩ 'kwa 'de Sinai crʋ "kpei ‑wɛe ɛ bla 'de ɛ ke Israɛ nyʋ 'nynɩ nɩ-.